Նախ և առաջ հարկավոր է խառնել խաղաքարտերը, և դրանցից մեկը տեղադրել սեղանի կենտրոնում այնպես, որ խաղաքարտի վրա պատկերված թվերը տեսանելի լինեն բոլոր մասնակիցներին: Մնացած խաղաքարտերը հարկավոր է բաժանել բոլոր մասնակիցների միջև՝ տեղադրելով դրանք յուրաքանչյուրի առջև այնպես, որ ոչ ոք չտեսնի խաղաքարտերի վրա պատկերված թվերը, այսինքն՝ դիմային կողմը դեպի վայր:
Խաղը սկսվում է այն ժամանակ, երբ բաժանող մասնակիցը բացականչում է՝ «ՍԿՍԵՑԻՆՔ»: Մինչ այդ մասնակիցներն իրավունք չունեն ձեռք տալ իրենց առջև դրված խաղաքարտերին: Խաղը սկսելուն պես մասնակիցները կարող են մեկ առ մեկ վերցնել իրենց առջև դրված խաղաքարտերը (չի կարելի վերցնել դրանք կույտերով):
Մասնակիցներից յուրաքանչյուրը կարող է ամեն պահի իր խաղաքարտերից որևէ մեկը տեղադրել կենտրոնում դրված խաղաքարտի վրա, եթե իր խաղաքարտի հիմնական արժեքը հավասար է կենտրոնում դրված խաղաքարտի հիմնական արժեքի և դրա ինդեքսի գումարին կամ տարբերությանը: Օրինակ՝ կենտրոնում դրված խաղաքարտի հիմնական արժեքը 5 է, իսկ ինդեքսը ±2 (5+2=7 կամ 5–2=3), ապա դրա վրա կարելի է տեղադրել 7 կամ 3 հիմնական արժեքներով խաղաքարտեր: Խաղը շարունակվում է սեղանին դրված խաղաքարտի վրա մեկ առ մեկ նոր խաղաքարտեր տեղադրելու սկզբունքով: Խաղաքարտը տեղադրելու ժամանակ հարկավոր է բացականչել դրա հիմնական արժեքը: Խաղում չկա հերթականություն, այսինքն՝ ով հասցնի, նա էլ խաղում է:
Եթե մասնակիցներից ոչ ոք չունի տեղադրելու պահանջներին համապատասխանող խաղաքարտ, ապա խաղը դադարեցվում է, բոլորը վայր են դնում իրենց խաղաքարտերը, բաժանող մասնակիցը փոխում է կենտրոնում տեղադրված խաղաքարտը կապուկի ներքևում գտնվող խաղաքարտով, որից հետո «ՍԿՍԵՑԻՆՔ» հրահանգով խաղը վերսկսվում է:
Կան դեպքեր, երբ հաշվարկի արդյունքում ստացվում են արժեքներ, որոնք մեծ են 10-ից կամ փոքր են 1-ից:
Առաջին դեպքում ստացված արժեքից հարկավոր է հանել 10: Օրինակ՝ նախորդ խաղաքարտի հիմնական արժեքը 9 է, իսկ ինդեքսը՝ ±3, ապա կարելի է տեղադրել 6 (9-3=6) կամ 2 (9+3=12, 12-10=2) հիմնական արժեքներով խաղաքարտեր: Երկրորդ դեպքում ստացված արժեքին հարկավոր է գումարել 10: Օրինակ՝ նախորդ խաղաքարտի հիմնական արժեքը 1 է, իսկ ինդեքսը ±2, ապա կարելի է տեղադրել 3 (1+2=3) կամ 9 (1-2=-1, -1+10=9) հիմնական արժեքներով խաղաքարտեր։
Փուլն ավարտվում է այն ժամանակ, երբ մասնակիցներից մեկի մոտ մնում է միայն մեկ խաղաքարտ, և անկախ խաղաքարտի արժեքից՝ մասնակիցը դնում է այն կենտրոնում` բացականչելով՝ «Ա՜Յ ԱՅՍՊԵՍ»:
Յուրաքանչյուր փուլի ավարտից հետո մասնակիցները գումարում են իրենց ձեռքում եղած խաղաքարտերի հիմնական արժեքներն ու գրանցում հաշվարկային աղյուսակում: Հաղթում է այն մասնակիցը, որը 6 փուլերի արդյունքում կհավաքի նվազագույն քանակությամբ միավորներ:
Մաղթում ենք հաճելի ժամանց:
